ఇంగ్లండ్‌తో వన్డే సిరీస్: భారత జట్టు ప్రకటన.. కోహ్లీ, బుమ్రా రీఎంట్రీ.. జైస్వాల్ ఔట్

ఇంగ్లండ్‌తో జరగనున్న మూడు మ్యాచ్‌ల వన్డే సిరీస్ కోసం భారత క్రికెట్ నియంత్రణ మండలి (బీసీసీఐ) 15 మంది సభ్యులతో కూడిన జట్టును ఆదివారం ప్రకటించింది. సీనియర్ బ్యాటర్ విరాట్ కోహ్లీ, పేస్ గుర్రం జస్ప్రీత్ బుమ్రా జట్టులోకి పునరాగమనం చేశారు. జూలై 14న ప్రారంభం కానున్న ఈ పర్యటనకు శుభ్‌మన్ గిల్ కెప్టెన్‌గా వ్యవహరించనుండగా, శ్రేయస్ అయ్యర్‌ను వైస్ కెప్టెన్‌గా నియమించారు.

ఐపీఎల్ 2026 సందర్భంగా కండరాల గాయంతో బాధపడిన విరాట్ కోహ్లీ, ఇటీవలే ముగిసిన ఆఫ్ఘనిస్థాన్ సిరీస్‌కు దూరమైన విషయం తెలిసిందే. అయితే, అతను పూర్తి ఫిట్‌నెస్ నిరూపించుకున్న తర్వాతే తుది జట్టులో ఆడతాడని బీసీసీఐ స్పష్టం చేసింది. ఇక, పనిభారం కారణంగా ఆఫ్ఘనిస్థాన్ సిరీస్‌కు విశ్రాంతి తీసుకున్న జస్ప్రీత్ బుమ్రా కూడా తిరిగి జట్టులోకి వచ్చాడు. ఇంగ్లండ్ పరిస్థితుల్లో భారత పేస్ దాడికి అతడు నాయకత్వం వహించనున్నాడు.

ఆఫ్ఘనిస్థాన్‌పై చివరి వన్డేలో సెంచరీతో అదరగొట్టిన యువ ఓపెనర్ యశస్వి జైస్వాల్‌పై సెలక్టర్లు వేటు వేశారు. కోహ్లీ రాకతో అతడికి చోటు దక్కలేదు. మరోవైపు, సీమ్ బౌలింగ్ ఆల్‌రౌండర్ హార్దిక్ పాండ్యా ఈ సిరీస్‌కు కూడా ఎంపిక కాలేదు. బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో గాయం నుంచి కోలుకుంటున్న క్రమంలో అతను ఇంకా పూర్తి ఫిట్‌నెస్ సాధించలేదని తెలుస్తోంది. గత సిరీస్‌లో ఆకట్టుకున్న లెఫ్ట్ ఆర్మ్ పేసర్ గుర్నూర్ బ్రార్ తన స్థానాన్ని నిలబెట్టుకున్నాడు.

ఇంగ్లండ్‌లో భారత పర్యటన జూలై 14న ఎడ్జ్‌బాస్టన్‌లో తొలి వన్డేతో ప్రారంభమవుతుంది. రెండో వన్డే జూలై 16న సోఫియా గార్డెన్స్‌లో, మూడో వన్డే జూలై 19న చారిత్రక లార్డ్స్ మైదానంలో జరగనుంది.

ఐర్లాండ్ సిరీస్‌కు వరుణ్ చక్రవర్తి దూరం

ఇదిలా ఉండగా, స్పిన్నర్ వరుణ్ చక్రవర్తి ఐర్లాండ్‌తో జరగనున్న టీ20 సిరీస్‌కు దూరమైనట్లు బీసీసీఐ ధ్రువీకరించింది. ఐపీఎల్ 2026లో ఎడమ కాలికి గాయపడిన అతను ప్రస్తుతం కోలుకుంటున్నాడని, పునరావాసం చివరి దశలో ఉందని బోర్డు ఒక ప్రకటనలో తెలిపింది. భారత్, ఐర్లాండ్ మధ్య టీ20 సిరీస్ జూన్ 26 నుంచి జరగనుంది.

ఇంగ్లండ్ పర్యటనకు భారత వన్డే జట్టు:
శుభ్‌మన్ గిల్ (కెప్టెన్), రోహిత్ శర్మ, విరాట్ కోహ్లీ, శ్రేయస్ అయ్యర్ (వైస్-కెప్టెన్), కేఎల్ రాహుల్ (వికెట్ కీపర్), ఇషాన్ కిషన్ (వికెట్ కీపర్), వాషింగ్టన్ సుందర్, అక్షర్ పటేల్, నితీశ్ కుమార్ రెడ్డి, కుల్దీప్ యాదవ్, జస్ప్రీత్ బుమ్రా, ప్రసిద్ధ్ కృష్ణ, హర్షిత్ రాణా, అర్ష్‌దీప్ సింగ్, గూరనూర్ బ్రార్.
(*ఫిట్‌నెస్ నిరూపించుకోవాల్సి ఉంటుంది)

ఐర్లాండ్‌తో టీ20 సిరీస్‌కు భారత జట్టు (సవరించిన):
శ్రేయస్ అయ్యర్ (కెప్టెన్), అభిషేక్ శర్మ, సంజూ శాంసన్ (వికెట్ కీపర్), ఇషాన్ కిషన్ (వికెట్ కీపర్), శివమ్ దూబే, తిలక్ వర్మ (వైస్-కెప్టెన్), నితీశ్ కుమార్ రెడ్డి, అక్షర్ పటేల్, వాషింగ్టన్ సుందర్, రవి బిష్ణోయ్, హర్షిత్ రాణా, అర్ష్‌దీప్ సింగ్, ప్రిన్స్ యాదవ్, వైభవ్ సూర్యవంశీ, ప్రసిద్ధ్ కృష్ణ.